الأثنين. مايو 29th, 2023

كتب/ موسي مجدي
بيض التفريخ بيتم غسله وتطهيره ثم وضعه فى ماكينات التفريج
الأسبوع الأول من وضع البيض له طقوس تنتهى بفرز البيض ثم إخراج اللائح وتشتريه محلات الجاتوهات بربع ثمنه وصالح للأكل فى خلال يومين على الأكثر.
الأسبوع الثانى له طقوس تنتهى بفرز البيض للمره الثانية وإخراج الكابس منه والتخلص منه بالمجارى.
فى اليوم ال ١٨ يرفعوا نسبة الرطوبه ولا يتم تحريك البيض أو تقليبه كما كان يحدث .
فى اليوم ال ٢٠ مساءا يبدأ فقس الكتاكيت اللى عمرك ماتقدر تحصل عليها ودى بتتوزع على العاملين بمحطات التفريخ لأن كتكوتها مميز ونموه سريع ومعامل تحويلة كبير جدا وغالبا لايصاب بالأمراض عدا مرض الجامبورا أو فقد المناعة.
فى اليوم ال ٢١ تبدأ الكتاكيت فى الفقس بنسبه كبيره جدا جدا حتى نهاية اليوم ودى الكتاكيت العادية اللى بتتربى وبتشتريها المزارع.
بعد اليوم ال ٢٢ الكتاكيت التى تفقس لا يرضى أحد يشتريها من أصحاب المزارع لإن نموه سئ ، وغير ذى جدوى فى تربيتة وثمن التربية والأعلاف بالخسارة ، لأن زملائه العاديين عندما يصلوا لوزن ٢ كيلو ونصف يكون هو وصل لنصف كيلو وعمره مايكبر عن كده وتربيتة فيها خسارة فادحة.
المفروض الكتاكيت دى لو مدير محطة التفريخ عنده ضمير بيتم جمعها وإعدامها لعدم الجدوى لكن فى الغالب العمال بتهربها وبتتباع فى الأسواق ال ٣ بعشره جنيه لتشجيع المغفلين على شرائه وأحيانا بيلونوها مع العلم إن سعر الكتكوت العادى من ١٠ جنيه ل ١١ جنيه للكتكوت الواحد .
واخيرا … لو تم إختيار البيض بعناية فائقة من حيث الحجم والإستدارة والمطاولة والتشققات وسمك القشرة بتقل النسبه كتير ودى محتاجه عماله مدربة وخبرة وأجورها مرتفعة بتصل ٥٠٠ جنيه فى اليوم لكن بترفع سعر التفريخ وبالتالى سعر الگتكوت وبالتالي المفرخين بيطنشوا.
فيديو إعدام الكتاكيت حاجة مش جديدة وعاوز تشوف مشهد الإعدام تشوفه عندنا فى محطة سبرباى كل ٢٥ يوم لكن نشر الفيديو بهذه الطريقة بيؤكد ركوب الأخوان وفلاسفة الهزيمة للميديا .
ياريت حد يكدبنى من أطباء البيطرى.

اترك تعليقاً

لن يتم نشر عنوان بريدك الإلكتروني. الحقول الإلزامية مشار إليها بـ *