واحة الأدب

قصيدة ”إلي أغلي من كان لي في الوجود” للشاعر عزت عبد العاطي .

كتب : عزت عبد العاطي 

إلي روح أبي
الطيب الودود
…………………….
مش كنت تقول
إن دي آخر ريحة ورد
اشمها منك ف التليفون !
مش كنت تلمح
إن دي آخر رشة مسك !
مش كنت تقول إنك ماشي !
وأنا مين يتكلم عني ف غيبتك
ويخلي شواشي النخل
تميل م الفرحه
لما لسان الشهد بصوتك
يذكر اسمي
مين يستني القطر
عشان ميشاور للسواق
بالراحه عليه
مين يسندني
لما الدنيا تشيل وتحط
والله الدنيا ف عيني يا بويا
علي قد وسعها
خرم الابره براح
حكاياتك زاد
بيحلي مرار الروح
ويمد في عمري قوام
علشان اتونس بيك
مع إن لساني بحور كلمات
فدادين احاسيس
لكن لما نويت ابعتلك
اكتبلك
ملقتش كلام
اصلك صعب حروف العالم
توصف طيبتك
ولا ايمانك
ولا وصاياك
اصلك صعب يكون في الدنيا ليك شبهين
مع إني فوق الخمسين
كنت بداري عيوبي ف كمك
كنت بدس الروح جواك
وأنت تطبطب
كنت استني عليا شويه
لما عضامي تشد شويه
واقدر علي مر الأيام
لسه السبحه معايا يا بويا
ريحتك فيها
وصوت حباتها
بيدعي لروحك بالرحمات
لسه عصايتك زي ما هيه
في ركن البيت
لسه روايح عطرك
ماليه شارعنا
لسه الناس بتعدي يا بويا
وتضرب كف بكف عليك
مين هيشد غطايا عليا
في ليل امشير
مين هيشقر كل شويه
قوم متنمش تكون عطشان
مين هيحن
ومين هيئن
ومين هيخفف كل الآمي
لو تعبان
مش كنت تقول انك ماشي
او كنت اديني اماره
تقولي وداع
احجز لي في ريحك حته
اتمدد فيها
واعوض كل سنين الغربه
معاك
واتأسف ليك !

اظهر المزيد

اترك تعليقاً

لن يتم نشر عنوان بريدك الإلكتروني. الحقول الإلزامية مشار إليها بـ *

زر الذهاب إلى الأعلى