كتب / آدم زويل
في تصريح لنجم الفنون القتالية محمود سبيع المصري المحترف بالولايات المتحدة قال إن الظروف اللي مر بها منذ عدة سنوات مع إتحاد المصارعة والمنتخب ، يمكن أن يكون معظمكم عاصرها ، ويعرف القصة جيدا .
وأكمل قائلا “في كام حاجه محتاج أقولها ، مؤخرًا وصلني معلومات مؤكدة من مصادر موثوقة من أصدقاء لي يلعبون في المنتخب ان الدولة بدأت تقدم الدعم في المعسكرات سواء المادي أو المعنوي على قد الإمكانيات المتاحة وبيوجدوا رعاة وبيحاولوا يوجدوا حلول جذرية لمساعدة الرياضيين والموهوبين وصناعة أبطال حقيقية تمثل البلد وتكون مثال يحتذي بيه بره وجوه على عكس زمان.
الأكيد ان بقى فيه دعم عن الأول وفيه رعاية ماكنتش موجودة على أيامي تمامًا. اتمني ان يكون في اهتمام اكتر واكبر من الدولة و اتمني ان الحال يبقى افضل لكل رياضيين بلدي علشان يمثلوها بالشكل المناسب اللي يليق بيها قدام كل العالم.
حتي انا دلوقتي بعد احترافي للفنون القتالية في امريكا ومش بلعب باسم مصر في اي لعبة أولمبية لسه برفع علم بلدي ، مع ذلك تم التواصل معايا شخصيآ بمكالمه هاتفيه بعد مباراتي السابقه في صربيا من الدكتور اشرف صبحي وزير الرياضه و قدم لي الدعم المعنوي واتمني الدعم و الاهتمام اكثر من ذلك علشان ابطالنا ومواهبنا الكتيرة في كل المجالات و الرياضات ادعموهم و هنشوف علم مصر في كل حته في العالم
آخر حاجة اما تشوف ابطال مصر في اي لعبة عرفوا الناس بيهم وصلوا صوتهم انشرو انجازاتهم ادعموا كل شخص بيحاول أو بيسعي يحقق لقب أو انجاز عالأرض مصر فيها أبطال و مواهب محتاجة تظهر للنور
