كتب / فتحي رستم- امين حزب صقور مصرية “تحت التأسيس”
الناس بتسأل ايه معنى كلام الرئيس السيسي وتهديده للقطاع الخاص
اذا لم تتراجع الاسعار فإن الدولة ستعود لشراء السلع الاساسية وتضخها في الاسواق. وطالب رئيس الوزراء بتوفير ٣ مليار دولار من الموازنه لذلك.
طبعا في حد حيقولي طب ما الرقابة تحكم قبضتها علي الاسواق وتنزل الاسعار
اقولك صح بس الدستور اللي احنا مضينا عليه بيقولك ان اقتصاد السوق اقتصاد حر للعرض والطلب يعني مفيش تسعير والشئ الوحيد اللي ممكن تراقبه هو تخزين السلع الاساسية بغرض الاحتكار او رفع اسعار غير مبرر. ودي بيقدروا يلعبوا فيها بثغره البيع للتصدير يعني بيعملوا عقود بيع تصديري مع شخصيات او مؤسسات في الخارج وفي اغلب الاوقات هي عقود صورية. وبالتالي البضاعة المخزنة هي بضاعة مباعه تنتظر النقل وبكده يخرج منها.
ما هو عادل امام قالها قبل كده في الفيلم احنا ناس لازم الباطل بتاعها يبقي قانوني.
علشان كده الحل ان الدولة تشتري السلع سواء من المنتجين المحليين او استيراد من الخارج وتضخها بسعر اقل بكثير في الاسواق فيضطر القطاع الخاص بالبيع بنفس السعر او ارخص منه.
يعني الدولة ستدخل كمنافس للقطاع الخاص بغرض موازنة السوق.
لان مع الوضع الجديد المفروض السلع اسعارها تنزل حوالي ٣٠٪ بعد تحرير سعر الصرف.
وخاصة بعد ان اوقفت الدولة تصدير السكر والارز والبصل والفول.
